గ్లోబల్ స్టార్ రామ్ చరణ్, డైరెక్టర్ బుచ్చిబాబు సానా కాంబినేషన్ లో వస్తున్న ‘పెద్ది’ సినిమా విడుదల విషయంలో సరికొత్త రికార్డ్ క్రియేట్ చేసింది. ఈ చిత్రం జూన్ 4న ప్రపంచవ్యాప్తంగా విడుదల కానుండగా, ఓవర్సీస్లో మరీ ముఖ్యంగా ఆస్ట్రేలియాలో భారీ స్థాయిలో రిలీజ్ కానుంది. అక్కడున్న ప్రముఖ సినిమా చైన్ ‘హోయిట్స్’కు సంబంధించిన అన్ని లొకేషన్లలోనూ రిలీజ్ కాబోతున్న తొలి చిత్రంగా ‘పెద్ది’ చరిత్ర సృష్టించనుంది.
ఈ సినిమాను న్యూజిలాండ్, ఆస్ట్రేలియా, ఫిజీ దేశాల్లో ప్రముఖ డిస్ట్రిబ్యూషన్ సంస్థ ప్రత్యంగిరా ఓవర్సీస్ పంపిణీ చేస్తోందని తెలుస్తోంది. సాధారణంగా పెద్ద సినిమాలు కూడా ఎంపిక చేసిన కొన్ని హోయిట్స్ థియేటర్లలో మాత్రమే విడుదలవుతాయి. కానీ, ‘పెద్ది’ చిత్రాన్ని ఆస్ట్రేలియాలోని అన్ని హోయిట్స్ సెంటర్లలోనూ ప్రదర్శించనుండటం విశేషం. ఇది తెలుగు సినిమాకు అంతర్జాతీయంగా పెరుగుతున్న ఆదరణకు నిలువెత్తు నిదర్శనం.
ఈ సినిమాలో బాలీవుడ్ బ్యూటీ జాన్వీ కపూర్ హీరోయిన్గా నటిస్తుండగా, కన్నడ స్టార్ శివరాజ్కుమార్ కీలక పాత్ర పోషించారు. దిగ్గజ మ్యూజిక్ డైరెక్టర్ ఏఆర్ రెహమాన్ సంగీతం అందించగా.. ఈ చిత్రాన్ని మైత్రీ మూవీ మేకర్స్, సుకుమార్ రైటింగ్స్ సంయుక్తంగా నిర్మించాయి. ఈ భారీ విడుదల ప్రకటనతో సినిమాపై అంచనాలు మరింతగా పెరిగాయి.
